阿克鸠射

ꑓꁴꐛꂨꀕꃅꀀꌠ

ꑓꋪꑠꋒꄺꉢꁴꇈ

ꉡꁴꄚꀉꁌꀋꁧꌟꃅ

ꃀꌠꐛꌠꊖꆈꋋꁕꉜꇎꎻ

ꉈꑴꆏꀉꄶꃅꈯꌟꃅ

ꐙꎴꌠꀊꌱꑕꑘꍈꌠꑋꉬ

ꅳꀧꃄꇖꄹꊂꃚꋒꃅ

ꅲꄏꑠꋒꄺꉢꁴꇈ

ꉡꁴꄚꁍꃀꅪꒌꇱꍹꎻꇁꌠ

ꁮꅉꂶꌠꅲꇎꎻ

ꉈꑴꆏꀉꄶꐥꍂꃅ

ꊽꉌꁠꌠꀊꉘꁮꅉꈨꌠꑌꐊ

ꏸꑭꊋꑌꑠꋍꋒ

ꄺꉢꁴꄉꅽꉪꐨꎖꑣꇈ

ꉡꁴꈝꃀꌕꁏꌕꍅꌠꆹ

ꆎꌌꂴꐚꊂꊛꃅꉉꌠꌧꈴꐝꉅꀐ

ꉡꁴꆲꋒꉐꆈꄊꇪꌠꆹ

ꆎꌌꄉꋯꑌꆏꊋꒉꃅꉉꌠꌧꈴꅉꐚꀐ

ꉌꃀꋍꂷꄺꉢꁴꄉ

ꉡꁴꅽꉂꏣꉂꑟꏃꎭꌊ

ꆲꁏꉐꐙꃅꐮꐊꄉ

ꉪꊈꈀꄸꑌꋓꃅꉌꃀꋍꂷꑋꌋ

ꀉꂥꃅꁏꐚꐺꄎꌠ

ꆳꁁꄩꃅꏸꆧꁨꅑꃅꌒꅊꇈ

ꈂꀸꅇꉉꇮꑠꁆꄺꉢꁴꄉ

ꅽꄙꈎꉌꉪꐨꉉꅐꎼꇁꇈ

ꆧꁨꃰꇌꈭꌠꁳꊰꇁ

ꆀꃅꑶꋦꐛꁓꄅꌠꑳꃴꅑꇁ

ꆈꌠꊿꋅꋋꁯꅿꁮꅉꆹꁱꇁ

ꋍꑍꇀꅉꀕꃅꅐꇁꌠꉘꁮꇬꇱꄉ……

ꀒ，ꋋꈨꉬꇮꆎꄻꉢꁴꌐꀐ

ꉡꆹꆏꀉꁁꋍꂷꉬ

ꉡꆹꆏꉬꀐ，ꉠꅿꊿꋅꉬꀐ

——ꋋꆹꅽꈛꎼꐺꄮꊩꌺꉬ！

——ꋋꆹꅽꅿꁮꇙꄮꉘꇉꐨꉬ！

——ꋋꆹꅽꀉꏀꃅꃨꂯꌠꃨꈭꉬ！ ꀒ ꃅꑍꋍꑍꆏꉡꑌꄡꇗ

ꋋꈨꉬꇮꀱꆎꁴꌐꌠꉬ

ꀱꆎꁴꄷꆏ，ꉡꆹꆏꉬꀐ

ꅽꅿꊖꆈꐛꅽꅿꃅꈯꐛ

ꅽꅿꑵꉙꐛꅽꅿꉂꐪꐛ

ꅽꅿꉌꉪꐨꐛꅊꇈ

ꀉꄶꈍꃅꑋꄡꇗꆏꇁꀋꉆ

——ꆀꃅꆀꆳ

——ꆀꃅꆀꌺ

……